24-27 martda Gürcüstanın paytaxtı Tbilisi şəhərində keçirilən Böyük Dəbilqə turnirində Azərbaycan Cüdo Federasiyasının hakimlər heyətinin üzvü “A” kateqoriyalı beynəlxalq dərəcəli hakim Nazim Umbayev ədalət təmsilçiləri arasında yer alıb.

Nazim Umbayev yarışda qadınlar arasında -52 kq. çəkidə final görüşünü və -70 kq. çəkidə bürünc medal uğrunda görüşü idarə edib.

26 martda Almaniyanın Bremen şəhərində keçirilən gənclər arasında Beynəlxalq Masters turnirində Azərbaycan cüdoçuları 2 qızıl, 1 gümüş və 1 bürünc medal əldə edib.

Turnirdə 21 ölkəni, o cümlədən Yaponiya, Braziliya, Almaniya, Fransa və Niderlandı təmsil edən 700-ə yaxın idmançı iştirak edib. Azərbaycan yarışda cüdo üzrə gənclərdən ibarət milli yığma komandanın 17 üzvü ilə təmsil olunub. Cüdoçulara gənclərdən ibarət yığmanın baş məşqçisi Elxan Məmmədov və gənclərdən ibarət yığmanın məşqçisi Elxan Rəcəbli rəhbərlik edib.

Turnirdə Nicat Şirinov (-60 kq.) və Qadir Hüseynov (-73 kq.) qızıl medal, Aydın Rzayev (-66 kq.) gümüş medal, Əli Hacıyev isə (-60 kq.) bürünc medal qazanıb. 

Məmmədrza Hacızadə (-81 kq.) 5-ci yerdə, Əjdər Bağırov, Nihad Şıxəlizadə (-90 kq.), Atabala Niftəliyev, Tamerlan Cabbarov (-100 kq.) və Məhəmməd Məhəmmədzadə (+100 kq.) 7-ci yerdə qərarlaşıb.

Azərbaycan yığması yarışda medal əyarına görə ümumi hesabda 1-ci yeri tutub.

Qeyd edək ki, idmançılarımız 27-29 mart tarixlərində Bremendə təşkil olunacaq təlim-məşq toplanışına qatılacaqlar.

24 martda Gürcüstanın paytaxtı Tbilisi şəhərində keçirilən Böyük Dəbilqə turnirində Azərbaycan cüdoçuları 1 qızıl, 1 bürünc medal qazanıb.

Yarışın ilk günündə 5 çəki dərəcəsində 7 cüdoçumuz tatamiyə çıxıb. Kişilər arasında -60 kq. çəkidə mübarizə aparan cüdoçu Turan Bayramov qızıl medala sahib olub. Turan finalda Gürcüstan təmsilçisi Qiorqi Sardalaşviliyə qalib gələrək fəxri kürsünün ən yüksək pilləsinə qalxıb.

Qadınlar arasında -52 kq. çəki dərəcəsində Gültac Məmmədəliyeva bürünc medal qazanıb. Gültac bürünc medal uğrunda görüşdə çinli idmançı Yeqinq Junu məğlub edib.

23 martda Gürcüstanın paytaxtı Tbilisi şəhərində Böyük Dəbilqə turnirinin püşkatma mərasimi keçirilib. Püşkatmanın nəticələrinə görə Azərbaycan cüdoçularının ilk rəqibləri məlum olub.

Xatırladaq ki, Azərbaycan cüdo üzrə milli yığma komandası yarışda 9 çəki dərəsində 9 kişi və 4 qadın cüdoçu ilə təmsil olunacaq.

Kişilər

-60 kq. 

Kəramət Hüseynov - Dilşot Xalmatov (Ukrayna)

Turan Bayramov - Aybek Omirov (Türkmənistan)

-66 kq. 

Kamran Süleymanov - Quram Dzavaşvili (Birləşmiş Ərəb Əmirlikləri)

-73 kq. 

Rəşid Məmmədəliyev - Mixeili Baxbaxaşvili (Gürcüstan)

Nəriman Mirzəyev - Edoardo Mella (İtaliya)

-81 kq. 

Rüstəm Orucov - Zaur Dvalaşvili (Gürcüstan)

Elcan Hacıyev - Anri Equtidze (Portuqaliya)

-90 kq. 

Vüqar Talıbov - Aram Qriqorian (Birləşmiş Ərəb Əmirlikləri)

+100 kq. 

Camal Qamzatxanov - İqnas Mekacus (Litva) / İrakli Demetraşvili (Gürcüstan) görüşünün qalibi

Qadınlar

-48 kq. 

Leyla Əliyeva - Venna Çjuanq (Çin)

-52 kq. 

Gültac Məmmədəliyeva - Yasmin Lima (Braziliya)

Aydan Vəliyeva - Naomi Van Krevel (Niderland)

-57 kq. 

Fidan Əlizadə - Pauline Strake (Almaniya)