Amerika Birləşmiş Ştatlarının Las-Veqas şəhərində usta cüdoçular arasında dünya çempionatının ikinci günündə cüdoçularımız kişilər arasında 1 qızıl və 1 bürünc medal əldə edib. 

Yarışın ikinci günündə M1 yaş kateqoriyası üzrə -90 kq. çəkidə Mərdan Qədirli qızl medal, M3 yaş kateqoriyası üzrə -100 kq. çəkidə İntiqam Ələkbərov bürünc medal qazanıb.

Azərbaycan Cüdo Federasiyasının (ACF) təşəbbüsü ilə Biləcəri qəsəbəsində yeni cüdo zalı fəaliyyətə başlayıb. Bununla əlaqədar olaraq, noyabrın 6-da ACF-in icraçı vitse-prezidenti Rəşad Rəsullu, vitse-prezident Elnur Məmmədli, Olimpiya çempionu Hidayət Heydərov və digər rəsmi şəxslər cüdo zalına baş çəkərək orada yaradılan şəraitlə tanış olublar.

Cüdo zalında 320 kv.m sahəsi olan “dojo” (cüdo məşq zalı) və 75 kv.m sahəsi olan fiziki hazırlıq zonası mövcuddur. Cüdo zalı Beynəlxalq Cüdo Federasiyasının rəsmi təchizatçısı olan Almaniyanın “Zebra” şirkətinin tatamiləri ilə, fiziki hazırlıq zonası cüdo idman növü üzrə uşaqların fiziki inkişafının təmin edilməsi üçün lazımi idman avadanlıqları ilə təchiz edilib. Bundan başqa, valideynlər üçün gözləmə zonası, məşqçi və paltardəyişmə otaqları da mövcuddur. 

Rəşad Rəsullu bildirib ki, ACF-in fəaliyyətində əsas istiqamətlərdən biri ölkədə mövcud olan cüdo məşq zallarının maddi-texniki bazasının təkmilləşdirilməsidir: “Bakı şəhərinin ən iri qəsəbələrindən olan və 50 mindən çox əhalinin yaşadığı Biləcəri qəsəbəsində ən müasir standartlara uyğun cüdo zalının fəaliyyətinin təmin edilməsi Federasiyanın bu istiqamətdə həyata keçirdiyi növbəti layihədir. Əminik ki, yeni fəaliyyətə başlayan cüdo zalı qəsəbədə yaşayan uşaqların, yeniyetmələrin və gənclərin asudə vaxtlarının səmərəli keçirmələri üçün gözəl imkan yaradacaq”.

Qeyd edək ki, Federasiya 2022-ci ildən etibarən Bakı və regionlarda 100-ə yaxın cüdo zalını 6,500 tatami ilə təmin edib və 1,300 idmançının ödənişsiz məşq keçməsinə şərait yaradıb. Həmçinin, Federasiyanın maliyyə dəstəyi ilə Sumqayıtda, Gəncədə, Zaqatalada və Qusarda regional təlim-məşq mərkəzləri fəaliyyətə başlayıb, Ağstafa, Sabirabad, Qazax, Zəngilan rayonunun Ağalı kəndi və Bakının Zirə qəsəbəsində cüdo zalları təmir edilərək istifadəyə verilib.

Növbəti ildə isə Federasiyanın fəaliyyət proramına uyğun olaraq, təxminən 50 cüdo zalının daha 4,000 ədəd tatami ilə təmin edilməsi, həmçinin İmişli, Şabran, Qax və bir sıra digər rayonlarda yeni cüdo zallarının istifadəyə verilməsi planlanır.

Azərbaycan cüdoçuları 9-10 noyabrda Amerika Birləşmiş Ştatlarının Las-Veqas şəhərində keçiriləcək dünya Kata çempionatında iştirak edəcək.

32 ölkədən 282 idmançının iştirak edəcəyi yarışda Azərbaycan 6 idmançı ilə təmsil olunacaq. Cüdoçularımız “Nage-no-Kata” və “Katame-no-Kata” üzrə fəndləri nümayiş etdirəcək.

Nage-no-Kata

Malik Alahverdiyev - tori (hücum edən idmançı) 

Samir İsmayılov - uke (hücum edilən idmançı) 

İsmayıl Rzayev - tori 

İbrahim Aslanov - uke

Katame-no-Kata

Rafiq Nəcəfov - tori 

Əmrah Əhmədov – uke

İdmançılarımıza uğurlar arzulayırıq!

Amerika Birləşmiş Ştatlarının Las-Veqas şəhərində veteranlar arasında dünya çempionatının ilk günündə cüdoçularımız 1 qızıl medal əldə edib.

4 noyabrda yarışda kişilər arasında 3 yaş kateqoriyası üzrə 3 cüdoçumuz medallar uğrunda mübarizə aparıb. M8 yaş kateqoriyası üzrə -90 kq. çəkidə Fərhad Rəcəbli bütün rəqiblərini tatamidə üstələyərək usta cüdoçular arasında dünya çempionatının 12-ci dəfə qızıl medalını qazanıb. M7 yaş kateqoriyası üzrə -90 kq. çəkidə Nazim Əliyev yarışı 5-ci yerdə tamamlayıb.