Azərbaycan millisi Avropa çempionu oldu

Moldovanın paytaxtı Kişineuda cüdo üzrə U-23 Avropa çempionatı başa çatıb.

İkinci yarış günündə Azərbaycan millisi bir dəst medal qazanıb. +100 kq çəki dərəcəsində tatamiyə çıxan Kənan Nəsibov bütün rəqiblərinə qalib gələrək qitə çempionu olub. Ömər Rəcəbli (-81 kq) gümüş, Aslan Kotsoyev (-90 kq) isə bürünc mükafata yiyələnib.

İlk yarış günündə isə İslam Rəhimov (-66 kq) qızıl medalı boynundan asmışdı.

Qeyd edək ki, cüdo tariximizdə ilk dəfə -66 kq və +100 kq çəki dərəcələrində idmançılarımız U-23 Avropa çempionatlarının qızıl medalını əldə ediblər.

Yekunda Azərbaycan millisi 2 qızıl, 1 gümüş və 1 bürünc olmaqla ümumilikdə 4 medalla həm ümumi komanda hesabında, həm də kişilər arasında turniri birinci pillədə tamamlayıb. Yarışda təkcə kişi cüdoçularımızın çıxış etməsinə baxmayaraq, yığmamız 37 ölkə arasında lider olmağı bacarıb. Birinci yerə görə təqdim olunan mükafatı kişilərdən ibarət milli komandamızın böyük məşqçisi Slavko Tekiç qəbul edib.