FEDERASİYA Haqqında

Tariximiz
Vizyonumuz
Missiyamız

KEÇMİŞDƏN GƏLƏCƏYƏ YOLUMUZ

1972-ci ilin mayında SSRİ Bədən Tərbiyəsi və İdman Komitəsi cüdonun yayılması haqqında qərar verib. Azərbaycanda da xüsusi bölmələr təşkil etmək, yarışlar təşkil etmək tapşırılıb. Cüdo ölkəmizdə qısa zamanda populyarlaşıb. Elə həmin ildə Respublika Cüdo Federasiyası yaradılıb.

Ağayar Axundzadə 1992-ci ildə SSRİ-nin əməkdar məşqçisi olan ilk mütəxəssisimizdir. Azərbaycanlı cüdoçular arasında birinci dəfə idman ustası adını qazanan Sahib İsmayılov, beynəlxalq dərəcəli idman ustası isə Qüdrət Pəncəliyevdir. Qızlar arasında ilk idman ustası Arzu Atayeva, ilk beynəlxalq dərəcəli idman ustası Gülşən Şirinovadır. Uğurlu ənənələr müstəqillik qazanandan sonra davam edib.

1972-ci ilin 2 noyabrında cüdo üzrə ilk yarışlar keçirilib. ”Burevestnik” cəmiyyətinin gənclər birinciliyində 70 idmançı mübarizəyə qoşulub.

1992-ci ildə Barselona Yay Olimpiya Oyunlarında Nazim Hüseynov vətənə qızıl medalla dönüb. Müstəqil Azərbaycanın Dövlət bayrağı ilk dəfə bu qələbə şərəfinə qaldırılıb.

2008-ci ildə Pekin Olimpiyadasında Elnur Məmmədlinin inamlı qələbəsi ölkədə bayram ovqatı yaradıb. Elnur və bürünc medal qazanan Mövlud Mirəliyev vətəndə böyük təntənə ilə qarşılanıblar.

2013-cü ildə Elxan Məmmədov müstəqil Azərbaycanın cüdo üzrə ilk dünya çempionu olaraq, adını ölkə idman tarixinə həkk edib.

2016-cı ildə Rüstəm Orucov və Elmar Qasımov Rio Olimpiya Oyunlarında gümüş medal qazanaraq, Azərbaycan milli komandasının böyük gücə və perspektivə malik olduğunu növbəti dəfə sübut ediblər.

2020-ci ildə Yay Olimpiya Oyunlarında İrina Kindzerskaya bürünc medal qazanaraq fəxri kürsüyə qalxıb.

2024-cü ildə Paris Yay Olimpiya Oyunlarında Hidayət Heydərov və Zelim Kotsoyev Olimpiya çempionu olaraq tarixi uğura imza atıblar.

Davamlı inkişaf

Vizyonumuz Azərbaycanı dünya cüdosunun aparıcı ölkələrindən biri kimi daha da möhkəmləndirmək və cüdonu cəmiyyətdə geniş yayılmış, sevilən və etibar edilən idman növünə çevirməkdir.

Biz beynəlxalq uğurları davam etdirməklə yanaşı, cüdonun insanın fiziki və mənəvi inkişafına verdiyi töhfəni daha geniş auditoriyaya çatdırmağı hədəfləyirik.

Məqsəd və prioritetlər

Missiyamız cüdonu hər kəs üçün əlçatan, dəyər əsaslı və insanın özünü kəşf etməsinə xidmət edən idman növü kimi inkişaf etdirmək və tanıtmaqdır.

Biz cüdonun hörmət, intizam, əzm, balans və özünəinam kimi dəyərlərini cəmiyyətə aşılamağı, yeni nəsilləri bu idman vasitəsilə daha güclü, sağlam və məqsədyönlü yetişdirməyi hədəfləyirik.