Kəmər imtahanları üçün münsif seçimi aparılıb

Azərbaycan Cüdo Federasiyası kəmər imtahanlarında münsif kimi iştirak etmək istəyən namizəd ekspertlərin bilik və bacarıqlarının qiymətləndirilməsini təşkil edib. Keçirilən qiymətləndirmə prosesində 20-dən çox namizəd iştirak edib və onların praktiki bacarıqları üzrə hazırlıq səviyyəsi yoxlanılıb.

Nəticələrə əsasən imtahanı uğurla başa vuran namizədlər 2026-cı ilin təqvim planına uyğun keçiriləcək kəmər imtahanlarında münsif kimi fəaliyyət göstərəcəklər. Bununla yanaşı, ekspertlərin peşəkar inkişafını dəstəkləmək məqsədilə onlar üçün əlavə təlim proqramları, metodiki seminarlar və təcrübə mübadiləsi sessiyalarının həyata keçirilməsi planlaşdırılır.

Qeyd edək ki, kəmər imtahanları Azərbaycan Cüdo Federasiyasının rəsmi standartları və beynəlxalq tələblər əsasında təşkil olunur. İmtahanların əsas məqsədi idmançıların texniki və taktiki hazırlıq səviyyəsinin obyektiv qiymətləndirilməsi, həmçinin ölkədə cüdo təhsilinin keyfiyyətinin yüksəldilməsidir. Yeni münsiflər heyətinin formalaşdırılması bu sahədə peşəkarlığın artırılmasına və qiymətləndirmə mexanizmlərinin təkmilləşdirilməsinə mühüm töhfə verəcək.