Klublar arasında ACF Kuboku keçirildi

17 sentyabr tarixində Hövsan qəsəbəsində yerləşən Fövqəladə Hallar Nazirliyinin (FHN) İdman Sağlamlıq Mərkəzində U-18 klublar arasında cüdo üzrə Azərbaycan Cüdo Federasiyasının(ACF) qarışıq komanda kuboku keçirilib.

Qızlar -48 kq., -57 kq. və +63 kq. çəki dərəcələrində, oğlanlar isə -60 kq., -81 kq. və +81 kq. çəki dərəcələrində güclərini sınayıblar.

Yarışda Bakı, Sumqayıt, Mingəçevir şəhərlərindən, Siyəzən rayonundan, Şimal, Şimal-Qərb, Qərb, Aran Qarabağ və Cənub regionundan olan 16 komandadan 124 idmançı mükafatlar uğrunda mübarizə aparıb.

Bürünc medal uğrunda görüşlərdə Qərb regionu 4:0 hesabı ilə Şimal-Qərb regionuna, Kanokan TT idman klubu isə 4:0 hesabı ilə Şimal regionuna qalib gəlib.

Final görüşü Bakı şəhəri 13 nömrəli İxtisaslaşdırılmış Olimpiya Ehtiyatları Uşaq-Gənclər İdman Məktəbi ilə Respublika Kompleks İdman Məktəbi arasında keçirilib. Respublika Kompleks İdman Məktəbi 4:1 hesabı ilə qalib gələrək ACF Kubokunun qızıl medalını qazanıb. 

Yarışın yekun nəticələrinə əsasən komandaların tutduqları yer belə müəyyənləşib:

1. Respublika Kompleks İdman Məktəbi

2. Bakı şəhəri 13 nömrəli İxtisaslaşdırılmış Olimpiya Ehtiyatları Uşaq-Gənclər İdman Məktəbi

3. Kanokan TT idman klubu

3. Qərb regionu

5. Şimal regionu

5. Şimal-Qərb regionu

7. Qədiroğlu idman klubu (Mingəçevir)

7. Neftçi idman klubu (Bakı)