Region cüdoçuları üçün təlim-məşq toplantısı təşkil edilib

Azərbaycan Cüdo Federasıyasının (ACF) təşkilatçılığı ilə Göygöl Olimpiya İdman Kompleksində 13 iyundan etibarən regiondan olan yeniyetmə cüdoçular üçün təlim-məşq toplantısı keçirilir. 60-dan artıq potensiallı region cüdoçularının iştirak etdiyi təlim-məşq toplantısı 23 iyuna qədər davam edəcək.

Təlim-məşq toplantısında Federasiya prezidentinin müşaviri Natiq Bağırov, Federasiyanın regionlarla iş üzrə məsul şəxsləri Musa İsmayılov və Ruslan Yunusovun rəhbərliyi ilə yeniyetmə cüdoçuların peşəkarlığının və onların hazırlıq səviyyəsinin artırılması istiqamətində müvafiq məşq proqramı tətbiq edilir.

Təlim-məşq toplantısı çərçivəsində həmçinin, 18 iyunda ACF-in performans direktoru Mark van der Hamın yeniyetmə cüdoçular üçün master klassı keçirilib. Master klass zamanı əsasən nevaza vəziyyətində (yerdə parter vəziyyəti) müxtəlif fəndlər yeniyetmə cüdoçulara nümayiş etdirilib.

Azərbaycan Cüdo Federasiyası bundan sonra da region idmançılarının rəqabət qabiliyyətlərinin artırılması və regionlarda cüdonun daha da kütləviləşdirilməsi üçün müvafiq tədbirlərini davam etdirəcək.