Azərbaycan Cüdo Federasiyasının (ACF) əsas fəaliyyət istiqamətlərindən biri regionlarda cüdonun inkişafı, eləcə də idman infrastrukturunun mərhələli şəkildə gücləndirilməsidir.

Bu məqsədlə ötən il ərzində ölkə üzrə 80 idman zalına ümumilikdə 6000-dək “Taishan” markalı tatami təhvil verilib.

Qeyd edək ki, 2022-ci ildən etibarən Bakı və regionları əhatə edən genişmiqyaslı dəstək çərçivəsində federasiya tərəfindən 179 idman zalına ümumilikdə 13 200 tatami paylanılıb.

Bununla paralel olaraq, 2022–2025-ci illərdə ACF tərəfindən Gəncə, Sumqayıt, Qusar, Ağstafa, Zaqatala, Goranboy, Sabirabad, Zəngilan rayonunun Ağalı kəndi, Bakının Zirə qəsəbəsi, Ağdaş, Kürdəmir, Astara, Cəlilabad, Tərtər, Qax, İmişli, Şabran və Zaqatalanın Mosul kəndində yeni cüdo zalları istifadəyə verilib.

Yeniyetmə qızlardan ibarət yığmanın üzvləri üçün sosial media təlimi keçirilib. 

Azərbaycan Cüdo Federasiyasının rəqəmsal marketinq üzrə aparıcı mütəxəssisi Elvin Əhmədin təqdimatında baş tutan təlimin məqsədi sosial mediada məsuliyyətli davranış, media qarşısında özünü doğru ifadə etmək və milli komandanın imicini qorumaq olub.

Təlim zamanı şəxsi hesabların idarə edilməsi, paylaşım mədəniyyəti, etik qaydalar, şərhlərə və tənqidə düzgün reaksiya, yanlış məlumatların yayılmasının qarşısının alınması, eləcə də federasiyanın kommunikasiya prinsiplərinə uyğun məzmun paylaşımı ilə bağlı tövsiyələr verilib.

Bundan əlavə, idmançının rəqəmsal imicinin karyera və komanda nüfuzuna təsiri barədə də fikir mübadiləsi aparılıb.

Kişi və qadın cüdoçulardan ibarət Azərbaycan millisi Avstriyanın Mitterzill şəhərində Olimpiya Təlim Düşərgəsindədir.

Avropa Cüdo Birliyinin təşkilatçılığı ilə keçirilən beynəlxalq təlim-məşq toplanışında idmançılarımıza Azərbaycan Cüdo Federasiyasının vitse-prezidenti Elnur Məmmədli, performans direktoru və kişilərdən ibarət yığmanın baş məşqçisi Riçard Trautman, eləcə də qadınlardan ibarət komandanın baş məşqçisi Amina Abdellatif başçılıq edir.

Dünyanın ən böyük və nüfuzlu cüdo təlim düşərgəsinə 50 ölkədən 900-dən çox idmançı qatılıb. Toplanış yanvarın 14-də başa çatacaq.

Azərbaycan Cüdo Federasiyasının prezidenti Rəşad Nəbiyev yeni fəaliyyətə başlayan Şabran Cüdo Təlim Mərkəzinə baxış keçirib. Səfər zamanı məşq prosesi və yaradılan şəraitlə tanış olunub, məşqçi heyəti və idmançılarla görüşərək onların fikir və təklifləri dinlənilib.

Görüşdə vurğulanıb ki, cüdonun kütləviləşdirilməsi, uşaqların, yeniyetmələrin və gənclərin fiziki-mənəvi inkişafına töhfə vermək ACF-in əsas prioritet istiqamətlərindəndir.

Həmçinin Şabran rayonunda və ümumilikdə regionda cüdonun inkişaf perspektivləri müzakirə olunub, bu istiqamətdə görüləcək əlavə tədbirlərlə bağlı müvafiq tapşırıqlar verilib.

Gənc qızlardan ibarət milli komandamız Yaponiyaya təlim-məşq toplanışına yollanıb. 

Osaka şəhərində təşkil olunan hazırlıq prosesində fiziki və texniki-taktiki çalışmalar icra olunur. 

Böyük məşqçi Saşa Herkenrat-Vimar və böyük performans analitik Zaur Babayevin rəhbərlik etdiyi toplanış yanvarın 30-da başa çatacaq.

Gəncə İdman Sarayında yeni cüdo zalı fəaliyyətə başlayıb. Tədbirdə Azərbaycan Cüdo Federasiyasının (ACF) icraçı vitse-prezidenti Rəşad Rəsullu, ACF prezidentinin müşaviri Natiq Bağırov, Olimpiya mükafatçısı, ACF İcraiyyə Komitəsinin üzvü Mövlud Mirəliyev, dünya çempionu, ACF İcraiyyə Komitəsinin üzvü Elxan Məmmədov və digər rəsmilər iştirak ediblər.

Müasir standartlara cavab verən tatamilərlə təchiz olunmuş zalın ümumi ölçüsü 483 kvadratmetrdir. Bundan başqa, məşqçi və paltardəyişmə otaqları da mövcuddur. Zalda 300-dən çox idmançı cüdo ilə məşğul ola biləcək. 

Qeyd edək ki, 2022–2025-ci illərdə Azərbaycan Cüdo Federasiyası tərəfindən Gəncə, Sumqayıt, Qusar, Ağstafa, Zaqatala, Goranboy, Sabirabad, Bakının Zirə qəsəbəsi, Ağdaş, Kürdəmir, Astara, Cəlilabad, Tərtər, Qax, İmişli, Şabran və Zaqatalanın Mosul kəndində yeni cüdo zalları istifadəyə verilib. Həmçinin Bakı və regionlardakı 179 idman zalına ümumilikdə 13200 tatami paylanılıb.

Yeniyetmə oğlanlardan ibarət milli komandanın yeni üzvləri üçün sağlam qidalanma və performans mövzusunda maarifləndirici seminar keçirilib. Seminar Azərbaycan Cüdo Federasiyasının tədris proqramı çərçivəsində təşkil olunub və gənc cüdoçuların idman inkişafında düzgün qidalanmanın roluna həsr edilib.

Təlim zamanı yeniyetmə yaş dövründə qidalanmanın niyə kritik olduğu, enerji səviyyəsi, diqqət və bərpa proseslərinə təsiri, karbohidratların düzgün istifadəsi, hidratasiya və bərpa pəncərəsinin əhəmiyyəti sadə və praktik nümunələrlə izah edilib. Beynəlxalq turnir təcrübələrindən real nümunələr təqdim olunaraq, səhv qidalanma və plansız çəki salmanın performansa mənfi təsirləri vurğulanıb.

Bu cür maarifləndirici fəaliyyətlər yeniyetmə idmançıların sağlam inkişafı və uzunmüddətli idman karyerasının qurulması baxımından xüsusi əhəmiyyət daşıyır.

Yeniyetmələrdən ibarət milli komandanın üzvləri üçün şahmat dərsi təşkil olunub. 

Məşğələnin əsas məqsədi cüdoçuların çevik qərarvermə, strateji düşünmə, analitik yanaşma bacarıqlarını inkişaf etdirmək olub. Eyni zamanda, təlim-məşq toplanışı ərzində asudə vaxtlarının səmərəli və faydalı keçirilməsi də nəzərə alınıb.

Azərbaycan Cüdo Federasiyasının (ACF) Hakimlər Komitəsinin təşkilatçılığı ilə milli komandaların Təlim-Məşq Mərkəzində Beynəlxalq Cüdo Federasiyasının tətbiq etdiyi qaydalardakı dəyişikliklərə həsr olunmuş seminar keçirilib.

Seminar ACF prezidentinin müşaviri Natiq Bağırov və ACF-in hakimlər üzrə meneceri, “A” kateqoriyalı beynəlxalq dərəcəli hakim Mətin Rəhimlinin rəhbərliyi ilə təşkil olunub.

Tədbirdə aşağıdakı mövzular üzrə ətraflı müzakirələr aparılıb, yeniliklər izah edilib və dəyişikliklər əyani şəkildə nümayiş etdirilib:

- yuko xalının hansı vəziyyətlərdə verilib-verilməməsi ilə bağlı yeniliklər;

- kumikatanın qırılması zamanı icazə verilən hallar və şido cəriməsinin tətbiq olunma meyarları;

- vaxtı uzatmağa görə veriləcək şido cərimələri;

- uşiro-sankaku texnikasının tətbiqi zamanı nəzərə alınacaq nüanslar;

- passivliklə bağlı şido cəriməsinin verilməsində yeniliklər;

- görüş zamanı tibbi müdaxilə ilə bağlı dəyişikliklər.

Yeniyetmə oğlanlardan ibarət milli komandanın üzvləri üçün Beynəlxalq Cüdo Federasiyasının tətbiq etdiyi yeni qaydalarla bağlı seminar təşkil olunub.

Seminar Azərbaycan Cüdo Federasiyasının (ACF) prezidentinin müşaviri Natiq Bağırov və ACF-in hakimlər heyətinin üzvü, “A” kateqoriyalı beynəlxalq dərəcəli hakim Nazim Umbayevin rəhbərliyi ilə keçirilib.

Tədbirdə qaydalardakı yeniliklər idmançılara praktiki nümunələr əsasında izah olunub, müxtəlif vəziyyətlər üzrə qərarvermə meyarları müzakirə edilib. Seminarın əsas məqsədi yeni tələblərin idmançılar tərəfindən daha düzgün mənimsənilməsi, yarış zamanı mümkün anlaşılmazlıqların qarşısının alınması və taktiki yanaşmanın təkmilləşdirilməsi olub.

Dekabrın 28-də kata üzrə ölkə çempionatı və birinciliyi keçirilib.

Abşeron Olimpiya İdman Kompleksində baş tutan turnir böyüklər, gənclər və yeniyetmələr arasında təşkil olunub. 

Yarış Beynəlxalq Cüdo Federasiyasının kata qaydalarına və hakimlik standartlarına uyğun keçirilib.

Mükafatçıları təqdim edirik:

Yeniyetmələr

I yer

Sadiq Abdullayev (Tori)

Rəcəb Əkbərov (Uke)

II yer

Səttar Nurullayev (Tori)

Zaur Nəzirov (Uke)

III yer

Nihat Camalov (Tori)

Rüstəm Məmmədov (Uke)

Gənclər 

I yer

Famil Əsədov (Tori)

Yusif Əhmədov (Uke)

II yer

Mirəbdülrəhim Abdullazadə (Tori)

Zidan Bəşirov (Uke)

III yer

Rəsul Əmirzadə (Tori)

Tahir Bünyadov (Uke)

Böyüklər 

I yer

Çingiz Əhmədov (Tori)

Seymur Məcidli (Uke)

II yer

Rahim Aslanov (Tori)

Yusif Əliyev (Uke)

III yer

Natiq Qurbanlı (Tori)

Elçin Mayılov (Uke)

Azərbaycan Cüdo Federasiyasının rəhbərliyi, həmçinin çempion cüdoçular Şabran rayonunda yeddinci “Qardaşlaşmış Qarabağ Məktəbləri” Qış düşərgəsinin iştirakçıları ilə görüşüblər.

Görüşdə Azərbaycan Cüdo Federasiyasının vitse-prezidenti, Olimpiya çempionu Elnur Məmmədli, Azərbaycan Cüdo Veteranları Assosiasiyasının prezidenti, “Judo Club 2012” İctimai Birliyinin sədri Azər Əsgərov, Olimpiya çempionu Hidayət Heydərov, Avropa çempionları Rüstəm Orucov və Orxan Səfərov, eləcə də digər rəsmi nümayəndələr iştirak ediblər.

“Zəfər” Şəhid Ailələrinə Dəstək İctimai Birliyi, Azərbaycanlıların İsveçrədəki Mədəniyyət Mərkəzi və Fransanın Nant şəhərində fəaliyyət göstərən “Həftəsonu Qarabağ Məktəbi”nin birgə təşkilatçılığı, Azərbaycan Diasporuna Dəstək Fondunun dəstəyi ilə təşkil olunan tədbirdə çempionlar düşərgə iştirakçıları ilə səmimi söhbət aparıb, öz həyat və idman yoluna dair təcrübələrini bölüşüb, onları məqsədyönlü və əzmkar olmağa çağırıblar.

Görüş çərçivəsində düşərgə iştirakçısı olan yeniyetmə cüdoçu, Vətən Müharibəsi Qəhrəmanı, şəhid XTQ baş giziri Mehrab Niftəliyevin qızı, ölkə birinciliyinin mükafatçısı Ləman Niftəliyevaya çempion cüdoçular tərəfindən cüdoqi hədiyyə olunub. 

Sonda görüşün təşəbbüskarı olan “Judo Club 2012” İctimai Birliyinin sədri Azər Əsgərov tərəfindən bütün düşərgə iştirakçılarına xatirə hədiyyələri təqdim edilib.

Qeyd edək ki, “Shabran Wellbeing Resort” İstirahət və Sağlamlıq Mərkəzində Fransanın Nant şəhərində fəaliyyət göstərən “Həftəsonu Qarabağ Məktəbi”nin şagirdləri ilə Vətənimizin ərazi bütövlüyü uğrunda canlarından keçən qəhrəman şəhidlərimizin məktəbli övladlarının iştirakı ilə keçirilən düşərgə ərzində müxtəlif maarifləndirici təlimlər, intellektual oyunlar, mədəni və idman tədbirləri təşkil olunur. Düşərgənin ikinci mərhələsinin 2026-cı ilin yay aylarında Fransada keçirilməsi planlaşdırılır.

Dekabrın 28-də 14 yaşadək cüdoçular arasında Azərbaycan birinciliyi başa çatıb. Mübarizənin son günündə komanda yarışları keçirilib.

Abşeron Olimpiya İdman Kompleksində reallaşan turnirdə oğlanlar arasında 10, qızlarda isə 5 kollektiv qüvvəsini sınayıb.

Oğlanların mübarizəsində Bakı şəhəri 13 nömrəli İOEUGİM PHŞ baş mükafata sahib çıxıb. Abşeron-Xızı RGİİ gümüş medallara yiyələnib. Respublika Kompleks İdman Məktəbi və Sumqayıt şəhəri 1 nömrəli İOEUGİŞM komandaları III yeri tutublar. 

Qızlardan təşkil olunmuş kollektivlərin yarışında isə Gəncə-Daşkəsən RGİİ komandası fəxri kürsünün ən yüksək pilləsinə qalxıb. Bakı şəhəri 13 nömrəli İOEUGİM PHŞ ikinci yerin sahibi olub. Respublika Kompleks İdman Məktəbinin komandası bürünc mükafata yiyələnib.

Dekabrın 27-da 14 yaşadək cüdoçular arasında Azərbaycan birinciliyində fərdi mübarizələr başa çatıb.

Abşeron Olimpiya İdman Kompleksində keçirilən yarışın üçüncü günündə son 6 çəkidə 129 idmançı tatamiyə çıxıb. 

Qızlar arasında -44 kq, -57 kq, +70 kq; oğlanlarda isə -46 kq, -60 kq və +73 kq çəki dərəcələrində mükfatçılar bəlli olub. 

Qeyd edək ki, ölkə birinciliyinə sabah komandalararası yarışla yekun vurulacaq.

Üçüncü günün medalçılarını təqdim edirik:

Qızlar

-44 kq

1. Ayla Məmmədli (AHİTA)

2. Fatimə Əli (Olp-Par Sumqayıt)

3. Səidə Səfərli (Bakı şəhəri 8 nömrəli İOEUGİM PHŞ)

3. Nərmin Niftalızadə (Şuşa UGİM)

-57 kq

1. Arzu İmanzadə (RKİM)

2. Sunay Məcidova (Bakı şəhəri 13 nömrəli İOEUGİM PHŞ)

3. Zəhra Mədətzadə (Yevlax UGİM)

3. Jalə Qocayeva (Olp-Par Sumqayıt)

+70 kq

1. Əsnad İlyasova (Lokomotiv İK)

2. Mina Cəbrayılzadə (Bakı şəhəri 13 nömrəli İOEUGİM PHŞ)

Oğlanlar

-46 kq

1. Məhəmməd Səfərov (Bakı şəhəri 10 nömrəli UGİM PHŞ)

2. Əli Qurbanlı (Bakı şəhəri 13 nömrəli İOEUGİM PHŞ)

3. Kamal Həsənli (Bakı şəhəri 13 nömrəli İOEUGİM PHŞ)

3. Kənan Gəncəliyev (Zabrat İK)

-60 kq

1. Kənan İsmayılov (Sumqayıt şəhəri 1 nömrəli İOEUGİŞM)

2. Rəfail Cahid Sərabi (Bakı şəhəri 10 nömrəli UGİM PHŞ)

3. Rəsul Rüstəmli (Bakı şəhəri 13 nömrəli İOEUGİM PHŞ)

3. Timur Şulman (DİN İC)

+73 kq

1. Baxış Əhmədov (Bakı şəhəri 13 nömrəli İOEUGİM PHŞ)

2. Yusif Ağakişiyev (RKİM)

3. Şükran Vahabov (Quba CİK)

3. Mixail Tarusov (Kanokan-TT İK)

Dekabrın 26-da 2025-ci ilin idman yekunlarına həsr olunan mərasim keçirilib.

Azərbaycan Respublikasının Prezidenti, Milli Olimpiya Komitəsinin Prezidenti İlham Əliyevin iştirak etdiyi tədbirdə ölkədə idmanın inkişafında xidmətləri olan idmançılar və idman mütəxəssisləri mükafatlandırılıb.

Möhtərəm Prezidentimiz Azərbaycanda idmanın inkişafında xüsusi xidmətlərinə və yüksək peşəkarlığına görə cüdo üzrə Olimpiya və dünya mükafatçısı, veteranlar arasında üçqat dünya çempionu Mövlud Mirəliyevə “Əməkdar bədən tərbiyəsi və idman xadimi” fəxri adının vəsiqəsini təqdim edib.

Dövlətimizin başçısı 2025-ci ildə yüksək nailiyyətlər qazanmış cüdo üzrə milli komandaların baş həkimi Ramil Vəliyevə və qadınlardan ibarət yığmanın məşqçisi İmamverdi Məmmədova yeni mənzillərin orderlərini təqdim edib.

Həmçinin, Azərbaycanda idmanın inkişafında uzunmüddətli səmərəli fəaliyyətinə görə cüdo üzrə Əməkdar məşqçi Tərlan Həsənova Azərbaycan Respublikası Prezidentinin fərdi təqaüdü veriləcək.

Azərbaycan cüdo ailəsi adından Cənab Prezidentə göstərdiyi diqqət və qayğıya görə dərin minnətdarlığımızı bildiririk. Bu yüksək qiymət cüdo ailəsinin üzvlərini yeni uğurlara ruhlandırır.